பெத்தவன் – மனித உறவுகளின் கதையா? தமிழ் மதிப்புரை

பெத்தவன் புத்தக விமர்சனம் | இமயம் | வாசிப்பு அனுபவம்

நூல்: பெத்தவன்

ஆசிரியர்: இமையம்

பக்கங்கள்: 40

வெளியீடு: பாரதி புத்தகாலயம்.

உயிர்மை இலக்கிய இதழில் வெளிவந்த, எழுத்தாளர் இமையத்தின் ஒரு சிறிய நெடுங்கதையே, 40 பக்கங்கள் கொண்ட தனி நூலாக வெளியிடப்பட்டுள்ளது...

எவ்வளவோ நவீனத்துவங்கள் பெருகிவிட்ட நிலையிலும், யாராலும் ஒழிக்கப்பட முடியாத, சாதி என்ற அரக்கனுக்கு கௌரவக் கொலை என்ற பெயரில் பலி கொடுக்கப்படும் இளம் காதல் இணையர்களின் மற்றும் அவர்களைப் பெத்தவனின் கொலை/ தற்கொலைகளுக்குப் பின்னணியில் உள்ள ஊர் மற்றும் சாதிப்பஞ்சாயத்து என்ற பெயர்களில் நடக்கும் கொடூரங்களை தனது இக்கதையில் வெளிச்சம் போட்டுக் காட்டியுள்ளார் ஆசிரியர்.

ஆசிரியரும் அதே பகுதியைச் சேர்ந்தவர் என்றாலும் இக் கொடுமைகளைப் பற்றி எழுதுவதற்கும் தைரியம் வேண்டும் என்பதை கதை மாந்தர்களே உணர்த்தி விடுகின்றனர்.

இருபது வருடங்கள் தவமாய்த் தவமிருந்து, பெற்ற மகளைக் கௌரவத்திற்காகக் கொலை செய்யுமாறு ஒரு தகப்பனை ஊர்கூடி நிர்பந்திக்கிறது...இருமுறை கொல்லுமாறு கூறியும் கொல்லாததால் அடுத்த முறை ஊரே அக்கொடூரத்தை அரங்கேற்றும் எனவும் அச்சுறுத்துகின்றனர்.

பெத்தவன் - இமயம்

எந்தெந்த வழியில் கொல்லலாம் எனவும் கொன்றவுடன் எரித்துவிடவும் ஆலோசனைகள் வழங்கப்பட்டு அனைத்தும் தயார் செய்து ஓர் இரவு மட்டும் அத்தகப்பனுக்குக் கெடு வழங்கப்படுகிறது.

இந்நிலையில் அக்குடும்பம் அந்த ஓர் இரவுக்குள் படும் பாடுகளும் அவர்களுக்குள் நடக்கும் பேச்சுவார்த்தைகளுமே இக்கதை....

அந்தப் பெண்ணுக்கு எதிராக அவளின் தாய் உள்ளிட்ட அனைத்துப் பெண்களுமே பேசி அவளை கொல்வதற்கு உடந்தையாக இருக்கும் மனநிலைக்குப் பெயர்தான் என்ன? 

தங்களால் செய்ய முடியாத ஒன்றை அப்பெண் செய்தது அந்தப் பெண்களுக்கே பொறாமையாக உள்ளதா? எதனால் அதைச் செய்கிறார்கள் என்பதை புரிந்து கொள்ளவே இயலவில்லை....

அப்பெண்ணை அந்தத் தந்தை கொல்லவில்லை எனில் சாதிப் பெருமைக்காக, அக்குடும்பமே தீயிட்டுக் கொளுத்தப்படும்...அல்லது அப்பெண்ணையும் அவளின் காதலனையும் ஊர்இளவல்கள் அனைவரும் கூடி சிதைத்துக் கொல்வார்கள்...அல்லது ஊரே சேர்ந்து அப்பெண்ணைக் கொன்று எரித்துவிடும்....

பெத்தவன் – இமயம் | தமிழ் புத்தக விமர்சனம்

சில நேர்வுகளில் பெண்ணைப் பாசமாக வளர்த்து கொல்ல முடியாத தகப்பன் எனில் அந்தப் பெத்தவன் ஊராரின் அழுத்தம் மற்றும் அவமானம் தாங்க முடியாமல் தன் உயிரை மாய்த்துக் கொள்ள வேண்டும்....இன்றளவும் நடைமுறையில் இருக்கும் இந்த காட்டுமிராண்டித்தனங்களை நாமும் அனுதினமும் நாளிதழ்களில் படித்துக் கடக்கிறோம் எதுவுமே செய்ய இயலாமல்...

எங்கோ ஒரு பெண் அனுதினமும் இத்துணை வதைகள் பட்டுக்கொண்டே இருக்கிறாள் என்ற எண்ணமே என்னைக் கொல்கிறது....

தன்னைச் சுற்றி நிகழ்காலத்தில் நடக்கும் அநியாயங்களை பதிவு செய்து அதன் மூலமாவது தீர்வு வராதா எனத் தேடும் எழுத்தாளர் இமையம் அவர்களின் எழுத்து காலத்திற்கேற்றது.....மாற்றங்கள் வேண்டும்....

எங்கதெ புத்தக விமர்சனம் | இமையம் எழுத்தில் ஒரு பார்வை

எங்கதெ – இமையம் | தமிழ் புத்தக விமர்சனம்

நூல்: எங்கதெ

எழுத்தாளர்: இமையம்

பதிப்பகம்: க்ரியா

பக்கங்கள்: 149

எழுத்தாளர் இமையம் அவர்களின் "பெத்தவன்" குறுங்கதைக்குப் பிறகு அவரது எழுத்தின் மீது ஆர்வம் கொண்டு அடுத்ததாகப் படிக்கத் தெரிவு செய்த கதை....

புத்தகங்கள் படிக்க நேரமில்லாமல் சிறு இடைவெளி விழுந்த நிலையில், 149 பக்கங்கள் என்பதால் சீக்கிரம் படித்து முடித்துவிட எண்ணி எடுத்த புத்தகம்....ஒரே நாளில் கடும் அலுவல்களுக்கிடையேயும் நம்மை விடாமல் படிக்கத் தூண்டி அப்புத்தகமே நம்மை விடாமல் இழுத்து, நம்மைப் படித்து முடிக்க வைத்துவிடும் வகையான எழுத்து....

விவசாயக் குடும்பத்தில் பிறந்து, மூன்று பாசக்காரத் தங்கைகளுடன் வளர்ந்தும் குடும்பத்தின் ஒரே ஆண்மகன் என்ற காரணத்தாலும், படித்த பிள்ளை என்பதாலும் காடுகரை வேலைகளைப் பார்க்கவிடாமல் செல்லமாக வளர்க்கும் கிராமத்துப் பெற்றோர்.

எந்த சீரும் செய்யாத செய்ய முடியாதவனாய் இருந்தாலும், தங்களுக்குத் திருமணமாகி குழந்தைகள் பெற்று விட்ட நிலையிலும், தன் புருஷனின் சம்பாத்தியத்திலிருந்து எடுத்த பணத்தை தம்மக்களுக்கு பொங்கல் பணமாக வழங்குவதற்காக,தங்கள் அண்ணனின் பாக்கெட்டில் பணம் வைக்கும் பாசமிகு தங்கைகள் உடன் வளரும் ஒரு அண்ணன். 

எங்கதே - இமையம்

தன் முப்பத்தி மூன்று வயது வரை எந்தப் பெண்ணையும் ஏறிட்டுப் பார்க்காத நல்லதொரு பையன், தடம்மாறி, தன் ஊர்ப்பள்ளிக்கு வேலை நிமித்தம் வந்த, இரு குழந்தைகள் கொண்ட ஒரு விதவைப்பெண்ணுடன் கொண்ட தொடர்பால், 10 ஆண்டுகள் தன் வாழ்க்கையை தொலைத்து, அப்பெண் வேறு ஊருக்கு மாறுதலில் சென்ற போது வேறு ஒருவருடன் தொடர்பு வைத்துக் கொண்டதன் காரணமாக, அப்பெண்ணைக் கொன்று விடத் துணியும் நிலை வரை அவன் வாழ்க்கையை, அவன் மனப்போராட்டத்தினை அவன் வார்த்தைகள் வழியாகவே சொல்வதே 'எங் கதெ'.

பத்திரிக்கைகளில் பரவலாக தினந்தோறும் ஒரு செய்தியாக நாம் இக்கதைகளைக் கடந்து வரும் நிலையில், அதன் பின்னே உள்ள ஆண் மனதின் எண்ணங்களை விருத்தாசலம் வட்டார வழக்கில் கதை நாயகனே நம்மிடம் பகிர்ந்து கொள்வதாகப் பதிவு செய்துள்ளார் எழுத்தாளர்.

ஒரு விதவைப் பெண் இரு பெண் பிள்ளைகளுடன் புதிதாக ஒரு ஊரில் பணிநிமித்தம் குடியேறும் நிலையில் என்னவெல்லாம் பாடுகள் பட வேண்டியுள்ளது என்பதையும் நாயகனின் சொற்கள் வழியாகவே அறிய முடிகிறது. 

தன் உடல் தேவைக்காகவும் பிற ஆண்களிடமிருந்து தன்னையும் தன் பெண்பிள்ளைகளையும் காத்துக் கொள்ளவும் கூட இவரைப் பயன்படுத்தியிருக்கலாம் என்ற எண்ணம் எழுவதையும் நம்மால் தவிர்க்க இயலவில்லை.

எங்கதெ – உணர்வுகளின் மொழி | தமிழ் மதிப்புரை

ஒரு பெண்ணின் மனதில் என்னதான் இருக்கும் என்று அறியத்துடிக்கும் ஆண்களின் பிரதிநிதியாய்த்தான் தெரிகிறார் நம் கதையின் நாயகன்.

இறுதியில் அதைத் தெரிந்து கொண்டாரா என்பதை நூலைப் படித்துத் தெரிந்து கொள்ளலாம்.

ஆங்காங்கே வட தமிழ் நாட்டின் வட்டார வழக்குத் தமிழில் எழுத்தாளர் கூறியிருக்கும் சில புது மொழிகள் தமிழில் காலம் கடந்தும் அழியாமல் நிற்கும்....

"அப்பத்தான் எனக்குத் தெரிஞ்சிச்சி நான் எறங்குன ஆறுல மறு கரை இல்லங்கிறது."

"எப்பவும் எங்கம்மா எங்கிட்டெ கண்ணாலதான் பேசும். கண்ணுத் தண்ணியாலதான் பேசும்."

"விரியன் பாம்புகிட்ட இருக்கிற விசத்துக்கு அதுவா பொறுப்பு?"

"கண்ணுத் தண்ணியால எந்தக் கோட்டை கரையும்? ஒடையும்?"

இமையம் அவர்களின் அனைத்து நாவல்களையும் அடுத்தடுத்துப் படித்து முடித்துவிடும் ஆவலை அவரது இந்த நாவலும் கூட்டுகிறது....